2023外置硬碟選購指南及人氣推薦

外置硬碟有咩用？

內置硬碟安裝喺主機或者手提電腦入面，負責儲存全機資料，包括程式、檔案以至整個運作系統，無咗佢電腦根本無法運行。至於外置硬碟，顧名思義就係喺電腦外面嘅儲存裝置，一般有四大用途：

1. 釋放內存空間

內置空間有限，尤其機身又輕又薄嘅手提電腦。一般文書處理嘅電腦只得256GB甚至128GB內存，裝完程式分分鐘已經無咩位剩！內存不足的話，電腦就會變慢甚至死機。將其他檔案移到外置硬碟無疑係個好方法。

2. 提升讀取速度

相片、影片、遊戲……嘅質素愈嚟愈高，檔案亦跟住變大，內置硬碟點會唔吃力，電腦點會唔變慢？如果用着一啲對系統要求高嘅程式，例如攞嚟執相剪片，睇片打機，情況就更加明顯。正因為咁，外置硬碟幾乎係設計師、攝影師、YouTuber嘅必備工具，咁樣做嘢先會順手有效率。而唔少PlayStation、Xbox玩家都會幫遊戲主機加外置硬碟，遊戲唔再窒窒下，玩都玩得盡興啲喇！

3. 備份

內置硬碟就係電腦嘅記憶，佢有咩頭暈身㷫——過熱、中毒、碰撞、唔小心浸咗水……種種危機都有機會令佢失靈，違失資料甚至連電腦都開唔返，又點可以唔定期用外置硬碟備份呢？

4. 傳輸檔案

外置硬碟插線即用，毋須安裝程式或者連接網絡都可以存取檔案，非常方便。而當要傳輸較大嘅檔案嗰陣，上傳下載可能要幾個鐘，萬一網絡接收不良更要重頭嚟過。哩個時候用外置硬碟轉傳檔案，幾十秒至一分鐘就搞掂。

外置硬碟點揀好？

用HDD定SSD技術？

HDD係指傳統硬碟，而SSD就係新式嘅固態硬碟。SSD係讀寫速度同耐用度上面，都比HDD優勝。而HDD最大嘅吸引力，就係價格較便宜，換言之以同樣嘅價錢就已經買到比SSD大嘅儲存空間。加上HDD嘅防護技術有所提升，比以前更耐用，所以至今仍然不乏粉絲。

要揀HDD抑或SSD，主要都係視乎用途。如果經常需要讀取大型檔案，例如畫圖、執相或者剪片，又或者希望改善遊戲流暢度的話，SSD會係較理想的選擇。而如果只係應付一般文書工作，或者用嚟做備份，咁HDD絕對足以勝任，有預算都情願揀大啲嘅儲存空間。

買幾大容量先夠？

最簡單又誠實嘅建議，就係睇預算做人，有大買大，當長遠投資。將來內置硬碟嘅負荷只會愈嚟愈重，需要移施去外置硬碟備份嘅檔案有增無減。況且，多啲用外置硬碟減輕內存壓力，電腦會更耐用，何樂而不為？

不過要留意，容量愈大，體積同重量會相應增加。如果需要帶備在身，可考慮買一大一小，一個用嚟備份，一個用嚟暫存檔案。

連接方法揀邊種？

通常你會見到規格上寫USB2.0、 3.0、3.1 Gen1 ……如果你覺得混淆，放心你並不孤單。簡單嚟講，數值愈大代表愈新款，傳輸速度愈快。USB可以向後兼容，所以無論揀邊一款都可以正常存取檔案。

另外，要留意你所用嘅電腦用邊一款接孔。以2016年後出產嘅Mac為例，只有Type C口，揀一個配備Type C線嘅硬碟就會方便好多。要注意，由於USB每次推出新標準，輸送量都進步近兩倍，舊制式始終會逐漸被淘汰，愈大機會需要讀卡器才能讀取。

要揀返作業系統專屬嘅硬碟？

作業系統有佢自己嘅語言，而大部分外置硬碟嘅預設格式都係Window先識睇嘅NTFS。如果想俾Mac用，就要將硬碟格式化並改成HFS。如果硬碟會經常遊走兩個系統，就可以揀兩個系統嘅共通語言——FAT32或者exFAT。