廣東話有一句俗語：「辛苦搵來自在食」，冇咩比自由自在食餐Lunch更能夠幫打工仔恢復元氣。不過，講就容易，幾乎每間公司嘅茶水間喺放飯時段都好繁忙，加上疫情之下多咗同事選擇帶飯，微波爐前嘅人龍就愈嚟長，排隊叮飯要愈嚟愈耐，又點叫得上自在呢？

唔想咁？不妨試試「帶飯恩物」加熱飯盒，放飯前預好時間加熱，一夠鐘就食得！事實上，市面早已反映打工仔嘅心聲，推出咗形形色色嘅加熱飯盒畀大家選擇。

1. 安全衞生
食安非常重要，飯盒首要係夠密封，甚至可以抽真空，保持飯餸新鮮、不變壞。其次，要使用通過食品級安全認證嘅物料，確保適合放置及加熱食物。當然，附設防乾燒、過熱自動關機等保護機制都好重要。

2. 輕鬆易攜
帶飯要經過通勤嘅考驗，飯盒或食物盒內膽必須夠輕便、盒蓋具防漏和安全鎖扣等設計。畢竟，行路可以有風，飯盒可以揈過90度，先算得上逍遙自在嘛！

3. 健康省時
好多人以為微波爐翻叮飯盒會有輻射，又或者會令食物流失營養，但其實呢啲理論暫時都冇確實嘅科學證據支持。反之長時間蒸煮，造成大量水蒸氣，會有更大機會令營養隨之流失。所以，應該選擇讓食物能夠喺較短時間內均勻受熱嘅飯盒，務求保留餸菜嘅鮮味同埋營養價值。有啲型號更有定時預設功能，或專用手機應用程式，咁你就可以更準確預算加熱溫度同時間，做個時間管理達人喇！

4. 方便易洗
返工食飯時間係得咁多，食完飯有時間剩都情願休息下，所以容易清洗嘅飯盒絕對有分加。選購之前可以留意飯盒或者食物盒內膽係咪可以輕易拆卸，係咪屬於不銹鋼、陶瓷等較易洗嘅物料。

5. 煮食功能
有啲蒸煮飯盒嘅功能唔只加熱咁簡單，直情適合打工仔係辦公室煮食，享用新鮮熱辣嘅飯菜。只要早一晚在家準備好簡單食材，放飯前洗落米，就可以一邊蒸飯一邊蒸餸。唔想食飯，亦可以用佢哋嚟煲粥、煮麵、蒸點心，諸如此類，正好發揮創意。其實，網上有唔少網友分享零失敗嘅辦公室食譜，成品外表討好，就連甜品都有，值得一試！無論你係喺辦公室擁有較大自由度嘅幸福一族，定係經常要加班或返夜更嘅忙碌一族，都可以放個蒸煮飯盒傍身，煮一人飯慰勞自己又得，煮宵夜同自己加油亦得。